ДОРНОГОВЬ АЙМГИЙН 2024 ОНЫ 07 ДУГААР САРЫН ЭХНИЙ 10 ХОНОГИЙН ЦАГ АГААРЫН НӨХЦЛИЙН ТОЙМ МЭДЭЭ

Температур: Агаарын дундаж температур нийт нутгаар 22.9-26.9 градус дулаан, олон жилийн дундажтай харьцуулбал нийт нутгаар ОЖД-аас 0.7-3.8 градусаар дулаан байлаа. Агаарын үнэмлэхүй их температур нутгийн +32-...+36 градус, үнэмлэхүй бага температур нийт нутгаар +13.....+16 градус байна. Хөрсний гадаргын дундаж температур нийт нутгаар +27....+36 градус дулаан, үнэмлэхүй их температур +58-...+66 градус дулаан, үнэмлэхүй бага нь нийт нутгаар +11...+14 градус дулаан байлаа.

Хур тунадас: 2024 оны 07 дугаар сарын эхний 10 хоногт Алтанширээ суманд огт ороогүй, бусад нутгаар 7.5 мм бороо орсон ба Эрдэнэ, Улаанбадрах сумдад ОЖД-ийн орчим, бусад нутгаар ОЖД-аас бага орж байна.

Салхи: Энэ 10 хоногт нийт нутгаар салхи шуурга багатай, 10 м/с-ээс дээш давж салхилсан өдөр 2-6 өдөр ажиглагдсан. Салхины хамгийн их хурд Хөвсгөл, Сайншандад секундэд 19-20 метр хүрсэн байна.

Зуншлагын байдал: Эхний 10 хоногийн байдлаар Дэлгэрэх, Сайншанд, Алтанширээ, Иххэт, Айраг сумдад бэлчээрийн ургамал 6-10 см-ийн өндөртэй, зуншлагын байдал сайн байна. Улаанбадрах сумын хойд болон өмнө, Эрдэнэ сумын хойд болон зүүн хэсгээр зуншлага дунд зэрэг, Мандах, Сайхандулаан, Хөвсгөл, Хатанбулаг, Өргөн, Замын-Үүд сумдын нутгаар зуншлага муу, бэлчээрийн ургамал хатаж гандсан, ургамлын дундаж өндөр 2-3 см байна. Замын-Үүд, Хөвсгөл сумдад дараалсан халуун хуурай нөхцлийн улмаас төлөөлөх сонгинолог ургамлууд хатаж үгүй болж байна.

МАА-н үйлдвэрлэлд: Малын бэлчээрлэлт саатсан тохиолдол гараагүй хэдий ч зуншлага тааруу байгаа сумдын малчид отор нүүдэл хийсээр байна. Зуншлагын байдлыг 4 зүгийн үнэлгээгээр үнэлэхэд Дэлгэрэх, Сайншанд, Алтанширээ, Иххэт, Айраг сумдын нутгийн ЗУНШЛАГА САЙН, Улаанбадрах сумын хойд болон өмнө, Эрдэнэ сумын хойд болон зүүн хэсгээр зуншлага ДУНД ЗЭРЭГ, Мандах, Сайхандулаан, Хөвсгөл, Хатанбулаг, Өргөн, Замын-Үүд сумдын нутгаар ЗУНШЛАГА МУУ байна. Малын усан хангамжийн дунд зэрэг, Эрдэнэ, Улаанбадрах, Айраг зэрэг сумдад хөдөөгүүр нуур тогтсон цаашид ургамлууд сэргэж зуншлага сайжирч байна.   Бүгчим халуун өдрүүд үргэлжилж байна.